ການບໍລິໂພກໄຟຟ້າຂອງຈີນໃນຊ່ວງເຄິ່ງທຳອິດຂອງເດືອນເມສາ ໄດ້ຟື້ນຕົວຈາກປີກາຍ ຍ້ອນວ່າເສດຖະກິດທີ່ໄດ້ຮັບຜົນກະທົບຈາກໄວຣັດໂຄໂຣນາເລີ່ມຟື້ນຕົວເທື່ອລະກ້າວ ພ້ອມກັບການຜ່ອນຄາຍມາດຕະການຄວບຄຸມຢ່າງເຂັ້ມງວດທີ່ປະຕິບັດເພື່ອຮັບມືກັບການລະບາດ.

ຜູ້ວາງແຜນຂອງລັດກ່າວໃນກອງປະຊຸມຖະແຫຼງຂ່າວໃນວັນຈັນວ່າ ການໃຊ້ພະລັງງານໃນເສດຖະກິດທີ່ໃຫຍ່ອັນດັບສອງຂອງໂລກໄດ້ເພີ່ມຂຶ້ນ 1.5% ໃນສອງອາທິດທຳອິດຂອງເດືອນເມສາ ເມື່ອທຽບກັບໄລຍະດຽວກັນຂອງປີກ່ອນ ໃນຂະນະທີ່ການຜະລິດໄຟຟ້າເພີ່ມຂຶ້ນ 1.2%.

ຈີນມີລາຍງານການຫຼຸດລົງ 4.2% ໃນເດືອນມີນາ ແລະ ຫຼຸດລົງ 10.1% ໃນເດືອນກຸມພາ ເມື່ອທຽບກັບປີກ່ອນໜ້ານີ້ ຍ້ອນເຈົ້າໜ້າທີ່ໄດ້ວາງຂໍ້ຈຳກັດຢ່າງເຂັ້ມງວດກ່ຽວກັບການເດີນທາງ ແລະ ການດຳເນີນທຸລະກິດ ເພື່ອປ້ອງກັນການແຜ່ລະບາດຂອງພະຍາດຄ້າຍຄືໄຂ້ຫວັດໃຫຍ່ ເຊິ່ງພົບຄັ້ງທຳອິດໃນເມືອງອູ່ຮັ່ນ ທາງພາກກາງຂອງຈີນ.

ຄະນະກຳມະການພັດທະນາ ແລະ ປະຕິຮູບແຫ່ງຊາດ (NDRC) ຍັງໄດ້ລາຍງານວ່າ ການຜະລິດພະລັງງານທັງໝົດໃນໄຕມາດທຳອິດຫຼຸດລົງ 6.8% ຈາກປີກ່ອນໜ້ານີ້. ໃນນັ້ນ, ການຜະລິດພະລັງງານຄວາມຮ້ອນ ແລະ ການຜະລິດພະລັງງານໄຟຟ້ານ້ຳຕົກ ຫຼຸດລົງ 8.2% ແລະ 9.5% ຕາມລຳດັບ ເມື່ອທຽບໃສ່ປີກ່ອນ.

ການໃຊ້ພະລັງງານທີ່ຍັງບໍ່ພຽງພໍໄດ້ເຮັດໃຫ້ລາຄາຖ່ານຫີນ, ເຊິ່ງເປັນເຊື້ອເພີງທີ່ໃຊ້ກັນຢ່າງກວ້າງຂວາງທີ່ສຸດສຳລັບການຜະລິດພະລັງງານໃນປະເທດຈີນ, ຫຼຸດລົງເຫຼືອ 498 ຢວນ (70.38 ໂດລາ) ຕໍ່ໂຕນ ໃນວັນສຸກ, ຫຼຸດລົງ 11% ນັບຕັ້ງແຕ່ຕົ້ນປີ.

ຜູ້ຊ່ຽວຊານຈາກສະຖາບັນຄົ້ນຄວ້າອຸດສາຫະກຳ, ສະມາຄົມຄົ້ນຄວ້າເສດຖະກິດຖ່ານຫີນຈີນ (CCERA), ຄາດຄະເນວ່າການບໍລິໂພກຖ່ານຫີນຂອງຈີນໃນໄຕມາດທຳອິດຢູ່ທີ່ 870 ລ້ານໂຕນ, ຫຼຸດລົງ 60 ລ້ານໂຕນຈາກປີກ່ອນໜ້ານີ້. ໃນນັ້ນ, ຄວາມຕ້ອງການຖ່ານຫີນໃນຂະແໜງພະລັງງານຫຼຸດລົງເກືອບ 50 ລ້ານໂຕນ.

ສຳນັກງານສະຖິຕິແຫ່ງຊາດຈີນສະແດງໃຫ້ເຫັນໃນວັນສຸກວານນີ້ວ່າ ພ້ອມກັບການຟື້ນຕົວຂອງການບໍລິໂພກຖ່ານຫີນ ແລະ ການຜະລິດພະລັງງານ, ຜົນຜະລິດຖ່ານຫີນຂອງຈີນໄດ້ບັນລຸລະດັບສູງສຸດເປັນປະຫວັດການໃນເດືອນມີນາທີ່ 340 ລ້ານໂຕນ.

ແຫຼ່ງຂໍ້ມູນ: ຣອຍເຕີ